ક્યાં જશો ?

.

.

ટેરવામાં ફૂટતી કૂંપળ હશે તો ક્યાં જશો ?

સંઘરેલી ભીતરે ઝાકળ હશે તો ક્યાં જશો ?

 

સાત સાગર આપ છોડીને જવાના દૂર પણ;

પાંસળી વચ્ચે નદી ખળખળ હશે તો ક્યાં જશો ?

 

ઓળખીતો એક છે માણસ ફક્ત તે શહેરમાં;

બારણે તેના અગર સાંકળ હશે તો ક્યાં જશો ?

 

સત્યના રસ્તા ઉપર તો આપ કેવળ એકલા;

આપની ચારે તરફ જો છળ હશે તો ક્યાં જશો ?

 

આ કુહાડીથી તમે કાપી શકો છો ઝાડ પણ;

કાળજામાં ઊગતો બાવળ હશે તો ક્યાં જશો ?

 

જ્યાં જવાના આપ ત્યાં પાછળ ભલે આવે નહીં

એક ડગલું આ ગઝલ આગળ હશે તો ક્યાં જશો ?

.

.

-જિજ્ઞેશ વાળા

 

જળ સરોવર

.

જળ સરોવર પાળ છોડીને નીકળ,

જીવ તું જંજાળ છોડીને નીકળ.

તારું પણ અસ્તિત્વ સાબિત થઈ જશે,

ગર્ભમાંથી નાળ છોડીને નીકળ.

લક્ષ્ય સુધી પ્હોંચવું દુષ્કર નથી,

પંખી તું આ ડાળ છોડીને નીકળ.

આંગણે એનું થયું છે આગમન,

તું હવે પરસાળ છોડીને નીકળ.

વિસ્તરે “નાદાન” સમજણ તે પછી,

આ બધી ઘટમાળ છોડીને નીકળ.

-દિનેશ ડોંગરે “નાદાન”

 

માટે સ્વપ્નપ્રેમી વિશેષણ સ્વેચ્છાએ વાપરું છું.

.
.
તારો જન્મદિવસ!
વર્ષોથી સ્વપ્ન હતું એક
તારો જન્મદિવસ – મારી હોવાપણાની ધન્યતાનો દિવસ
આપણે સાથે રહીશું એની પ્રત્યેક પળે
પછી સમાધાન કર્યું મનનું,
જગતના વહેવારને ધ્યાનમાં લઈને
કલાકોમાં મન મનાવવાનું નક્કી કર્યું.
આટલા સમયથી રાહ જોતી રહી છું હું જેની,
એ ‘તું’, તારી શોધ હતી મને જન્મથી જ.
એ પૂરી થઇ હતી આજે
તારા મમ્મી-પપ્પાને ઈશ્વરે નિમિત્ત બનાવ્યાં,
મારી પ્રાર્થના પૂરી થવાને!
(પ્રાર્થનાની પૂર્ણતા માટે કોઈકે નિમિત્ત બનવું પડે.)
ને તું આવ્યો!
પણ મળ્યો કેટલો મોડો?
હું રાહ જ જોતી રહી – આજ સુધી.
ને મળ્યો ત્યારે ય?
આજે તારી વર્ષગાંઠ
ને તો ય…
હું રાહ જોતી જ રહી ને!?
‘રાહ’ જોવાની ભેટ મળી છે મારા ભાગ્યને!
ને તને આ પર્વે આપું છું હું ભેટ
ચિરકાલીન પ્રણયની! વિસ્તરતી મિલન ક્ષિતિજોની!
.
.
- તુષાર શુક્લ
(મારા દ્વારા થોડા ફેરફારો સહીત)